பரிமளா அண்ட் கோ _ விமர்சனம்
ஃபேமிலி டிராமா எனப்படும் குடும்பப் பாங்கான படங்களை உருவாக்குவதில் முத்திரை பதித்த இயக்குனர் பாண்டிராஜ்
வழக்கமான பாசம், அழுகை சென்டிமென்ட் டிராக்குகளை எல்லாம் ஓரமாக ஒதுக்கிவிட்டு, இந்த முறை முழுக்க முழுக்க கலகலப்பான சஸ்பென்ஸ் த்ரில்லர் ரூட்டில் புது வண்டியை ஓட்டியிருக்கிறார்.
கதை
ஆரம்பத்தில் ஒரு ஜாலியான, கலகலப்பான குடும்பக் கதையாகத் தான் படம் தொடங்குகிறது. ஆனால், சட்டென்று கியரை மாற்றி, ஒரு கொலை வழக்காக மாறி மர்மத்தை நோக்கி விறுவிறுப்பாக நகர்கிறது திரைக்கதை.
அடுத்து என்ன நடக்கப் போகுது? என்ற ஆர்வத்தை க்ளைமாக்ஸ் வரை தக்க வைத்தது தான் இயக்குநரின் சாமர்த்தியம். அதோடு, இன்றைய தலைமுறைக்கு அவசியமான போதைக்கு எதிரான ஒரு வலுவான கருத்தையும் திரைக்கதையில் நேர்த்தியாகப் பிணைத்திருக்கிறார்கள்.
யார் யாருடைய ஆட்டம் எப்படி?
ஜெயராம் – ஊர்வசி கெமிஸ்ட்ரி அபாரம். இவர்களது காம்போதான் படத்தின் மிகப்பெரிய பிளஸ் பாயிண்ட் .
இவர்களது எதார்த்தமான நடிப்பும், வெடிச்சிரிப்பு வரவழைக்கும் டைமிங் காமெடியும் தியேட்டரை சிரிப்பலையில் ஆழ்த்துகிறது.
மிஷ்கின்: ஆரம்பத்தில் மிகச் சாதாரணமாக வந்துபோகும் இவரது கதாபாத்திரம், க்ளைமாக்ஸ் நெருங்கும் போது யாரும் எதிர்பாராத ஒரு மாஸான திருப்பத்தைக் கொடுத்து அசர வைக்கிறது.
சாண்டி மாஸ்டர்: நடனத்தை தாண்டி, முற்றிலும் ஒரு புதிய பரிமாணத்தில் வந்து ரசிகர்களின் கவனத்தை முழுமையாக ஈர்க்கிறார்.
சஞ்சனா மற்றும் அனந்திகா இருவரும் தங்களுக்குக் கொடுக்கப்பட்ட பாத்திரங்களை மிகக் கச்சிதமாகப் புரிந்து, நேர்த்தியான நடிப்பை வெளிப்படுத்தியிருக்கிறார்கள்.
பலம் & பலவீனம்
முதல் பாதி முழுவதும் நகைச்சுவை மற்றும் விறுவிறுப்பான பொழுதுபோக்கு அம்சங்களோடு செம ஸ்பீடாக பறக்கிறது. இரண்டாம் பாதியில் திரைக்கதை சற்றே வேகம் குறைந்து நிதானமாகப் பயணித்தாலும், சஸ்பென்ஸ் முடிச்சுகள் அவிழாமல் நகர்வதால் சுவாரஸ்யம் குறையவில்லை.
க்ளைமாக்ஸ் ட்விஸ்ட் பெரிய அளவில் நம்மை அதிர வைக்கவில்லை என்றாலும், குடும்பத்தோடு தியேட்டருக்குப் போய் ஜாலியாக ரசிக்க எந்தக் குறையும் வைக்கவில்லை.
பாட்டம் லைன்: சிரிப்புக்கும் பஞ்சமில்லை, சஸ்பென்ஸுக்கும் குறைவில்லை… ‘பரிமளா அண்ட் கோ’ பக்கா ஃபேமிலி என்டர்டெய்னர்!