டார்க் ஜெயண்ட்: விமர்சனம்
திகில் படங்கள் என்றாலே சி.ஜி. மாயாஜாலங்களும், சட்டென்று குதிக்கும் ஜம்ப் ஸ்கேர்களும்தான் நம் நினைவுக்கு வரும்.
அந்தப் பாதையிலிருந்து விலகி, அமானுஷ்யம் மற்றும் மூடநம்பிக்கையை மையப்படுத்தி ஒரு மர்மக் கதையைச் சொல்ல முயன்றிருக்கிறது ‘டார்க் ஜெயண்ட்’.
பண நெருக்கடியில் சிக்கியிருக்கும் கதாநாயகன், பூர்வீக சொத்துக்காகத் தனது மனைவி மற்றும் தங்கையுடன் தாத்தா வசிக்கும் கிராமத்திற்குச் செல்கிறான்.
மரணப்படுக்கையில் இருக்கும் தாத்தாவின் அந்தப் பிரம்மாண்டமான பழமையான வீடு, ஏதோ ஒரு மர்மத்தைச் சுமந்துகொண்டு காத்திருக்கிறது.
அங்கு நடக்கும் அமானுஷ்ய சம்பவங்களும், அதற்குப் பின்னால் இருக்கும் சோனியா அகர்வாலின் மர்மமான பின்னணியும் இணைந்து திரைக்கதையை நகர்த்துகின்றன.
கதையைத் தாங்கிப் பிடிக்கும் நாயகன், பயம் மற்றும் குழப்பமான உணர்வுகளை இயல்பாக வெளிப்படுத்தியுள்ளார்.
சோனியா அகர்வால் தனக்குக் கொடுக்கப்பட்ட பாத்திரத்திற்குச் ஆழமான நடிப்பின் மூலம் நியாயம் செய்திருக்கிறார்.
விருந்தினராக வந்து செல்லும் பாக்கியராஜின் பங்களிப்பு கதையோட்டத்திற்கு உதவியிருக்கிறது.
அருவி மதன் தனது நடிப்பால் மிரள வைக்கிறார். ஜோவிதா, லிவிங்ஸ்டன் எனப் பிற நடிகர்களும் தங்கள் கடமையைச் சிறப்பாகவே செய்துள்ளனர்.
எனினும், அனுபவம் வாய்ந்த நடிகர்களின் பாத்திரங்களுக்கு இன்னும் சற்று கூடுதல் முக்கியத்துவம் கொடுத்திருக்கலாம்.
ஒளிப்பதிவாளர் தனது கேமரா கண்களால் அந்தப் பழமையான மாளிகையையும், கிராமத்துச் சூழலையும் அச்சமூட்டும் விதமாகக் காட்சிப்படுத்தியுள்ளார்.
பட்ஜெட் கட்டுப்பாடு இருந்தாலும், சில நேர்த்தியான ஷாட்கள் படத்தின் தரத்தை உயர்த்துகின்றன. பின்னணி இசை பல இடங்களில் திகில் உணர்வை மெருகேற்றுகிறது. ஆனால், பாடல்கள் கதையோட்டத்தோடு பெரிய அளவில் ஒன்றவில்லை.
சாத்தான் வழிபாடு, நரபலி போன்ற கருப்பொருள்களைப் பயன்படுத்தி, தேவையற்ற ஆடம்பரம் இன்றி காட்சிகளாலேயே பயத்தை உருவாக்க இயக்குநர் முயன்றிருக்கிறார்.
கதை சொல்லும் முறையில் அதே பழைய டெம்ப்ளேட்டைப் பயன்படுத்தியிருப்பது சற்று சலிப்பைத் தந்தாலும், மேக்கிங்கில் முத்திரை பதித்திருக்கிறார். திரைக்கதையில் இன்னும் கொஞ்சம் சுவாரஸ்யமான திருப்பங்களைச் சேர்த்திருக்கலாம்.
கதையின் அடிப்படையில் பெரிய புதுமை இல்லை என்றாலும், மூடநம்பிக்கைகளைத் தர்க்கரீதியாகச் சாடும் கருத்தைக் கொண்டிருப்பது படத்திற்குப் பலம் சேர்க்கிறது.
வழக்கமான பேய்க்கதைகளைத் தாண்டி, இருண்ட நம்பிக்கைகளும் மர்மமும் கலந்த அனுபவத்தை விரும்புபவர்களுக்கு ‘டார்க் ஜெயண்ட்’ ஒரு சுவாரஸ்யமான முயற்சி.
திகில் ரசிகர்களுக்கு இது ஒரு திருப்தியான அனுபவமாகவே இருக்கும்.
இந்தத் திரைப்படம் தியேட்டர்களை ‘ஃபுல்’ ஆக்குமா அல்லது ‘டல்’ ஆக்குமா?
வழக்கமான சினிமா ரசிகர்களைத் தாண்டி, ஒரு வித்தியாசமான திகில் அனுபவத்தைத் தேடுபவர்களை ஈர்க்கும் விதத்தில் இருப்பதால், படத்திற்குப் பாஸ்மார்க் கொடுக்கலாம்.